The taking of Le Mans and the flight of Henry II from the History of William the Marshal

This section offers the text in the original medieval French. For the English translation, click here.

Al Mans fu li reis d'Engletere

Molt iriez, qu'il perdeit sa terre;

Si apela le Mareschal

8384 Willeaume, qi molt esteit mal

De l'ire a del corruz li rei,

E de Bruillon seignor Guifrei

E son frere ensemblë o lui,

8388 E seignor Peron le filz Gui,

E seignor Robert de Sovile,

Qui meilz se baratout en vile

Qu'as chans, ge ne sai qu'en die el,

8392 S'ert il mareschals de l'ostel.

Si lor dist qu'al matin levassent

E que l'ost sorveeir alassent

E quel part il se voldrent traire.

8396 E cil, qui bien le voldrent faire

A son talent, matin leverent;

De lor armeüres s'armerent

Linges, por legierement corre

8400 Ou por chacier o por rescorre;

Par matinet s'armerent tuit.

A enveiseüre, a deduit

Passerent outre la rivere

8404 De Wilengne; une nieule trop fiere

Fist al matin, qui fu contraire

A cel qu'il aveient a faire.

Tant esrerent qu'il s'enbatirent

8408 Sor lor coreors e les virent;

Cil gieus ne lor fu pas egals.

Lors monterent en lor chevals,

Lor escuz e lor lances pristrent,

8412 Le pas a la voie se mistrent.

E Robert de Souvile dist

Al Mareschal: "Par Jhesu Crist,

Sire, se creüz en esteie,

8416 En bone fei vos loereie

Que j'alasse de si qu'al rei

E li deïsse a qel desrei

Vent li rei de France sor lui."

8420 "Sire, par mei n'irez vos hui,"

Fait li Mareschal, "ce conter,

Ne porreit a nul bien munter;

Einz irai, si com gel lou,

8424 E sire Guifrei de Brislou

Veeir quel gent ce sunt qui vienent,

Si vesrom com il se contienent."

Un molt petit tertre monterent,

8428 Si virent de la ou il erent

Trestote l'ost li rei de France,

Qui chivalchot a grant pussance

Si pres d'els que d'une arbaleste

8432 I traïst l'om, qui l'eüst preste.

"Guifrei," fait sei li Mareschals,

"Alom nos en, qu'il sereit mals

D'arester en nule maniere."

8436 Lors vindrent a lor gent ariere,

A lor compaingnons reconterent

Les noveles si com els erent.

Robert de Souvile autre feiz

8440 Dist: "Mareschal, il serreit dreiz

Que j'alasse ce al rei dire."

"Ja par mei n'i irez, beal sire,

Par le gleive Dieu, gel vos di."

8444 Lors dist Guifreis: "Ahi! ahi!

Com fu grant dels e grant damage

Qu'Eumenidus n'out tel message

Com vos estes a son bosoing!

8448 Mal fu que trop li fustes loing;

Molt li eüssiez grant mestier."

Lors s'en ristrent li chevalier.

Missires Guifreis de Bruslou

8452 Dist al Mareschal: "Ge vos lou,

Quant cist coreor si pres vienent,

Qui de nului conte ne tienent,

Que nos lor laisson chevals corre.

8456 Ainz que nus les peüst secore

I avreit ja peneals tornez;

Sis avriom si atornez,

Qui as freins les porreit aerdre,

8460 Qu'il sereient as roncins perdre."

E li Mareschal respondié:

"Tost porrom aveir gaaingnié,

Puet estre, vint roncins ou trente;

8464 Mais nos n'avom ci nule atente,

Quer nos n'avom gaires chevals;

E ge cuit, se ge seie sals,

Que unques en terre ou nos fumes

8468 De chivals tel mestier n'eüsmes

Comme nos avrom hui cest jor.

Li reis de France sanz sejor

Chevalche e s'en vient dreit al Mans;

8472 Bien tost tesgereient les flans

A nos chevals, se issi ert fait,

Einz que venisson a recet."

A itant si s'en retornerent;

8476 Al Mans vindrent, si reconterent

Al rei ce que veü aveient

E que certeinement saveient.

Quant vit li boens reis d'Engletere

8480 Que eisi bareiout sa terre

Li reis de France par sa gile,

Lors s'en eisi fors de la vile

O ses barons; por tel besoingne

8484 Fist depecier lo pont de Voingne

E si fist les guez bien paler,

Que nuls hom n'i peüst aler,

N'a pié, n'a cheval, sanz meschief;

8488 E si fist feire de rechief

Fossez, que passer n'i peüssent

Par nul engin que il seüssent,

Quer il cuidout por verité

8492 Qu'il n'i eüst nul autre gué.

Dementres que eissi parloient

De l'autre part gardent, si voient

Outre l'eive li rei de France

8496 Venir o tote sa puissance.

Iloc voleit la nuit atendre,

Si i fist les pavillons tendre

Lez un bois qui a non le Parc,

8500 Sus la rivere al trait d'un arc.

E li Mareschal dist al rei:

"Beal sire, ore entendez a mei;

Ceste gent qui sunt herbergié,

8504 Par fei! si loereie gié

Qu'aillon reposer nos chevals,

Si serom demain plus pres d'als,

Que nos vesron qu'il voldront faire

8508 E nos kenostrons lor afaire."

"Par Deu! Mareschal," dist li reis,

"Vos dites bien e que corteis."

A ces paroles s'en alerent

8512 En la vile, si deviserent,

Se li reis de France veneit

Envers la vile, qu'en fereit

Tot ardeir defors la cité,

8516 E issi fu por verité.

L'endemain sanz longe ademesse

Firent molt tost chanter la messe,

Que molt dotoent le grant ost;

8520 E li Mareschal s'arma tost.

Li reis, a une porte aval,

Toz desarmez e a cheval

Devers la Meison Dieu eissi;

8524 Mais nel vout mie fere issi

Li Mareschal, si fist que sages;

Creistre l'en peüst grant damages.

Li reis dist: "Kar vos desarmez,

8528 Mareschal; por qu'estes armez?"

E li Mareschal respondi:

"Si vos pleist, sire, itant vos di,

A estre armé me pleist molt bien

8532 Mes armes ne me nuissent rien.

Ne me desarmerei imés

Devant qu'aie seü quel fes

Nos couvendra a endurer.

8536 Hom desarmez ne puet durer

En bosoingne n'en grant afaire;

Nos ne savom qu'il voldrunt faire."

E li reis respondi: "Par fei!

8540 Donc ne vendrez vos mie o mei."

A telz paroles, a telz diz

Fist li reis desarmer son fiz,

Le conte Johan, qu'il amout

8544 E en qui il molt se fiout,

E seingnor Girard Talebot

E monseingnor Robert Tresgot

E Guifrei de Bruslou ausi,

8548 E qui unques o lui eissi

De la vile se desarmerent,

Outre la Meison Dieu alerent.

La s'esturent a un conseil

8552 Tuit cil qui erent si feeil

E si virent sanz demorance

L'avant garde le rei de France;

Chevalchent par de la de front

8556 Tant qu'il vindrent endreit le pont,

Qui depeciez esteit de gré.

Nuls hom ne cuidout iloec gué,

Mais a lor lances i tasterent:

8560 Le meillor gué del mont troverent.

Dis chevaliers tant s'avancierent

Que utre le gué se lancierent;

Cist afaire nos genz deçut.

8564 Robert Tresgot les aperçut

Si dist al rei: "Beal sire chiers,

Vez ci venir lor chevaliers."

Girart Talebot, comme saive,

8568 Prist son escu e prist un gleive;

E un chevalier vint devant

Bien loing des autres galopant;

E missires Girarz l'encontre

8572 Si l'a si feru a l'encontre

Sor son escu que il depiece

Son gleive e vole en meinte piece.

Sire Richart li fiz Herbert

8576 Vit le cop bien fait e apert

Que sire Girard aveit fait;

Son escu prent, avant se treit

E un gleive prent en sa main,

8580 Si lesse corre tot de plein

Vers un autre qu'il vit venir,

Si l'asene de tel aïr

Sor l'escu que li gleives froisse,

8584 De si qu'enz es poinz li escroisse.

E li boens Mareschals, si kut,

Devant la porte ou il s'estut

A Johan d'Erlee demande

8588 Son hielme, a lacier li comende

E dit qu'a drait repentant erent

Cil qui oreinz se desarmerent,

E qu'or vodreient estre armé

8592 Cil qui esteient desarmé.

Johan d'Erlee li bailla

Li hiealme e molt tost li laça;

Cil estut devant la porte

8596 Toz solz, que nuls ne li aporte

Conseil ne confort ne aïe,

E il se defent e aïe

Comme boens chevaliers deit faire

8600 Quant il est en itel afaire.

E li Franceis en lor venir

Le vindrent durement ferir;

E il se defendi si bien

8604 Que sor lui ne conquistrent rien;

E cil qui sor la porte esteient

E sor la britasche crieient

Hautement, amont e aval:

8608 Ça, Dex aïe al Mareschal!"

Cil de Betune les oï,

Bauduïn, pas nes mesoï,

Kar si ert la chose establie

8612 Qu'il ert de sa conestablie

E si l'amout sor tote rien,

C'esprova il mainte feiz bien.

Sire Hue de Malalnei

8616 I vint, si com g'entent e crei;

Sire Renalt de Danmartin

Qui n'aveit nul meillor veisin,

E qui fu puis quens de Boloingne,

8620 I vint poingnant sanz nule essoingne;

E Hue de Hameleincort

Ne vient pas, mes il i acort;

Sire Eüstace de Novile

8624 Vint poingnant contreval la vile;

Eüstace de Cantelou

Ne se rehastout mie pou;

Raol de Plonquet, c'est la fins,

8628 E sire Pierres Malvesins,

Cist eisirent parmi la porte;

S'i out bone meslee e forte,

Qui ne commença pas a gieus.

8632 Estes vos que misire Andreus

De Chaveingny, uns chevaliers

Des gens le comte de Peitiers,

Renomez de haute proëce,

8636 Dreit a nos chevaliers s'adresce.

La veïsiez grant bruiseïz

De lances e grant chapleïz

Sus hiealmes d'espees d'acier;

8640 La n'aveit mot del manescier

Ne des rampones avant trere,

Asez aveient el a fere;

A forte meslee e a fiere

8644 Remenerent nos genz ariere,

Quer trop vindrent a grant desrei.

Sire Hue de Malalnei,

Qui bien s'i esteit combatuz,

8648 Fu enz el fossé abatuz

De la vile, si com mei semble,

Lui e son cheval tot ensemble.

Li Mareschal o Bauduïn

8652 E o Renalt de Danmartin

Durement lor corurent sure,

Sis reüserent en poi d'ure,

E nos gens sor els recouvrerent

8656 Si que par force les menerent

Ariere tresk'emi la rue,

Pres de autretant cum uns ars rue;

E si sachiez k'en cel retor

8660 Out grant meslee e grant estor.

Li Mareschal tendi la main

Si prist seignor Andrieu al frein,

De Chaveingni, si l'en mena;

8664 Jusqu'a la porte l'amena,

Si que li chevals qui tost porte

Out la teste dedenz la porte.

Uns de la bretesche la sus

8668 Jeta une grant piere jus

S'asena mon seingnor Andrieu

El braz, trop li fist malveis gieu,

K'en deus meitiez li pecia.

8672 E uns autres jus renveia

Une pere grant e honeste;

Son chival feri en la teste,

Si hernua si ke li freins

8676 Remist al Mareschal es mains,

E li chevals torna ariere;

Si s'en parti en tel maniere

Misire Andreus tot quitement

8680 Mais molt fu bleciez durement.

Li Mareschal jete en la porte

Le frein, e un vaslet l'em porte,

E retorna a la meslee,

8684 Qui encor n'ert pas desmeslee,

Quer nuls ne s'en voleit retraire,

Tant tendeit chascuns a bien faire.

En la meslee prist as mains

8688 Deus autres dunt il mit les freins

Pres a pres, mais si le joerent

Que par les freins li eschaperent

E partirent de la meslee,

8692 Testemoingne Johan d'Erlee

A qui, quit, li frein baillié furent.

Quant cil le dient quis rechurent,

Come d'oïe e de veüe,

8694 Dunc deit la chose estre creüe.

Teles furent les mesestances

Que retrois o les fers de lances

Geseient amont e aval,

8700 Ke un asena le chival

Al Mareschal en tel maniere

Quil meheingna del pié desriere.

Li Mareschal tendi la main

8704 Si prist tantost parmi le frein

Un qui molt ert boens chevaliers

Des genz le conte de Peitiers,

Qui out non Heimeriz Odart;

8708 Mais cil ne prist il pas endart,

Quer il l'en mena sor son peis,

S'esteit il nez del Losduneis;

Bien le tint e tant le mena

8712 Que en la porte l'amena,

Lors li vint li reis a l'encontre

Tot desarmez; kant il l'encontre:

"Mareschal, or n'en dotez mie,

8716 Vostre bone chevalerie

Nos porreit molt bien nuire encui.

D'itant aperceü me sui

Ke nule de nos autres portes

8720 Ne sunt si bones ne si fortes;

A itant vos poez aerdre

Que nos i porriom bien perdre."

"Sire," fait sei li Mareschal,

8724 Sis entroient ce serreit mal,

Ice ne fait pas a teisir,

Mais or seit a vostre pleisir.

Mais itant vos voil amenteivre:

8728 Faites cel chivaler receivre

Que ge ai pris, sil vos an main."

"Vos meïsmes pernez en main,"

Fait li reis, "de lui ben garder

8732 E si le feites desarmer."

Lors descendi li Mareschals,

Que meshaigniez ert si chevals,

Si est montez sor le destrier

8736 Qu'il out pris od le chivalier,

E li chivalier, n'i out el,

En enveia a son ostel;

Puis ala avant o le rei,

8740 Qui par outrage e par desrei

Fist alumer, por verité,

La vile defors la cité.

Quant li reis de France ce veit,

8744 Qui uncor nul talent n'aveit

De torner i, sanz plus atendre,

Fist tantost ses pavillons tendre

Outre l'ewe, de l'autre part;

8748 Ce li est bel ke la vile art.

Li reis en veit en grant ennui

E li Mareschal ovec lui

Amont e aval la cité,

8752 Dont le jor fu desherité.

Une feme virent plaingnant

E angoissosement plorrant

Qui fors de sa meison meteit

8756 Le suen, quer alumee esteit.

Li Mareschal, qui ert pitos,

En fu dolenz e angoissos,

Si fist ses escuiers descendre

8760 Pur lui aider, sanz plus atendre;

E il meïmes descendi,

Qui molt volentiers entendi

A lui aider e a secorre;

8764 Molt voluntiers voleit rescore

Li mal; tele esteit sa costume.

Lors prist une coute de plume,

Qui par desoz ert alumee,

8768 S'en issi si forte fumee

Qu'il li torna a si grant grief

Qu'oster li estut de sun chef

Son hielme, qu'enstorse i esteit

8772 La fumee qui li nuiseit.

Quant li reis en la cité vint,

Tele aventure lui avint

Que li feus ovec lui entra

8776 En la vile, si aluma

La vile en treis lieus ou en quatre,

Si k'onques nel porrent abatre

Tut cil qui ovec lui i erent,

8780 Ainz laissierent, si s'en alerent.

Li reis enveia en sa vile

Por le conte de Magnevile,

Si fu ou lui li Mareschals,

8784 Qui toz dis fu fins e leals,

E des autres barons asez

I out ovec lui amassez,

E pristrent conseil, ça me semble,

8788 Hastif d'aler s'en tuit ansemble;

O lor herneis, ove le rei

S'avoierent vers Freesnei.

Issi comme il eissirent fors,

8792 Li Mareschal s'en issi lors

De la vile toz desarmez,

Quer il n'esteit de ren armez

Fors de son porpoint solement.

8796 Eisi s'en issi senglement;

E kant cil de l'ost esgarderent

Que la gent le rei s'en alerent

E que la cité deguerpirent,

8800 Beal lor fu k'aler les en virent

Sis suïrent a fine chace:

S'est qui fuie asez est qui chace.

E li quens de Peitiers monta

8804 Sor son chival, einz ne s'arma

Fors d'un porpoint, sans plus de feste,

Un chapel de fer en sa teste,

Sis porsiwi isnelement

8808 .................................................

A els atainst, mais neporquant

Autres l'ateinstrent avant,

Quer Phelipes de Colombiers

8812 S'avança devant toz premiers,

Qui de ses maisneienz esteit

E qui grant pris d'armes aveit,

S'ala un chevalier ferir

8816 Sor son escu de grant aïr.

Quant Willeaume vit le desrei,

Des Roches, qui ovec le rei

S'en alout, lors torna ariere;

8820 D'une lance forte e entiere

L'ala ferir en itel guise

Que dusque es poinz peceie e bruise.

Li kuens de Peitiers vint atant

8824 De grant aïr eperonant,

De celui des Roches escrie:

"Willeaume, ge tienc a folie

Vostre sejor e vostre ester,

8828 Quer ci vos fait mal arester;

Vos gastez le tens en alvesre,

Amendez vos couvient vostre esre."

Al Mareschal ne fu pas gent

8832 Quant il vit si venir lor gent;

A lei d'ome averti e saive

Prist tost sun escu e son gleive,

Des esperons feri tot dreit

8836 Al conte Richard qui veneit.

E quant li quens le vit venir,

Si s'escria par grant haïr:

"Por les gambes Dieu, Mareschal!

8840 Ne m'ociez, ce sereit mal;

Ge sui toz desarmez issi."

E li Mareschal respondi:

"Nenil! diables vos ocie!

8844 Kar jo ne vos ocirai mie."

Si feri sor son cheval lors

De sa lance parmi le cors

Que il morut en es le pas;

8848 Unques avant n'ala un pas,

Ainz morut, e li quens cha_.

Ço fu beals cops; bien enchaï

A cels qui devant s'en aloient,

8852 Kar autre rescosse n'avoient

Qu'il ne fusent ou mort ou pris,

Kar issi l'avoient enpris

Cil qui bien le peüssent faire,

8856 N'eüst esté iceste afaire.

Li chevalier e li servent

A qui enz ainz vindrent avant,

Quant li quens Ricart sailli sus,

8860 Si lur a dit: "Ne tesez plus,

Quer ja averez tot perdu;

Tuit estes fol e esperdu."

Des qu'il l'out eisi prononcié

8864 N'en ala plus avant un pié.

This text was translated by Stewart Gregory, with the assistance of David Crouch. The full text and translation of this work will be published soon by the Anglo-Norman Text Society in a three volume set. We thank Ian Short of the Anglo-Norman Text Society and David Crouch for their permission and assistance in republishing these section.