battle of Lincoln 1217

The Battle of Lincoln in 1217

This section offers the text in the original medieval French. For the English translation, click here.

Ore oie qui oreiles a;

16132 De bien oïr s'entende ja!

Qu'en cez moz orreiz ja la somme

Com Dex conseilla le prodome

Qui devant toz ert esleüz

16136 E plus presiez e plus creüz.

"Oiez, frans chevaliers leials,"

Dist Willemes li Mareschals,

"E qui al rei estes en fei;

16140 Por Dieu, or entendez a mei,

Kar molt i fait bien a entendre.

Quant nos, por nostre pris defendre,

E por nos e por nos amanz

16144 E por femes e por enfanz,

E por defendre nostre tere

E por tresaute enor conquere,

E por la pais de sainte Glise

16148 Que cil ont enfrete e malmise,

E por aveir redemption

De toz noz pecchez e pardon,

Sostenons des armes le fes,

16152 Gardez n'i ait ui nul malveis!

Partie de nos enemis

Se sunt dedenz Nichole mis;

S'i sunt entré, jel sai de veir

16156 Por nostre chastel asseeir,

Mes n'i sunt mie tot ensemble.

Sire Loeïs, ce me semble,

Est en autre païs torné;

16160 Cil qui se sunt atorné

Se sunt enbatuz folement.

Trop nos deduirons molement

Se nos ne pernons or venjance

16164 De cels qui sunt venu de France

Por nostre gent deseriter,

Dont il se quident eriter.

Destruire nos vuelent de bot;

16168 Por Deu, metons tot a tot,

Kar, se nos avons la victorie,

Bien devons aveir en memorie

Qu'enor nos en sera creüe,

16172 E la franchise defendue

A nos e a nostre lignage

Que en volent par lor outrage

Tolir nos, mes bien la tendrons;

16176 Dex velt que nos nos defendons.

E quant lor ost est departie,

Nos veintruns mielz l'une partie

De lor genz que trestoz ensemble;

16180 C'est dreiz e reson, ce me semble,

Dex le velt e raison le prueve.

Dunt est dreiz que chascuns s'esmueve

Son son poër a cest afaire,

16184 Car autrement nel pouons fere.

N'i a nul sol de nos ne veie

Qu'il couvient delivrer la veie

Devant al fer e a l'acier;

16188 Or n'i a mot del manacier,

Mes isnelement lor corons sore.

Diex nos a doné tens e ore,

Soie merci, de nos vengier

16192 De cels que por nos ledengier

Sunt ci venu e por mal faire;

Nus ne s'en deit ariere traire:

Bien venge son mal e sa honte

16196 Cil qui sun enemi sormonte."

A cez diz pristrent esperment

E cuer e force e ardement,

K'aler avant rien ne lor coste.

16200 Le mecresdi de Pentecoste

Dessi qu'a Newerc chevalchierent;

La nuit iloc se herbergerent.

Le juesdi aprés sejornerent;

16204 E li Normant qui en l'ost erent

Dusqu'al gienvle Mareschal vindrent,

A teil parole le tindrent

Comme vos m'orrez aprés dire:

16208 "En non Dieu," font il, "beals dolz sire,

Vos fuistes neiz en Normendie;

Si est bien dreiz que l'en vos die

E qu'os sachiez que li Normant

16212 Deivent lé premiers cops avant

Aveir en checune bataille.

Gardez qu'endreit vos ne defaille."

E quant li cuens de Cestre oï

16216 Ces moz, point ne s'en esjoï,

Ainz lor dit pleinnement sanz faille,

S'il n'a la premiere bataille,

Qu'il n'ireit ovec els en l'ost,

16220 Ne de lui n'avreient acost.

Li Mareschal e cil qu'i erent

La discorde point n'i amerent,

S'otreierent tuz ses talenz,

16224 Salve la dreiture as Normanz.

Quant agreanté fu l'affere,

Li legaz, qui bien le dut faire,

Les assolt en remission

16228 De lor pecchez e en pardon,

De trestoz icels que il firent

Puis icele ure qu'il nasquirent,

Si qu'il en fussent quitement

16232 Salvé al jor del jugement.

Puis escumenia les genz

De France qui erent dedenz;

Issi fu fet, bien le seit l'en.

16236 Li legaz vers Notingaham

Tint son dreit chemin e sa veie.

L'ost ves Torkesie s'aveie;

La nuit i jurent, tant vos di,

16240 E l'endemain al samedi

Aprés messe les armes pristrent

D'els acesmer mult s'entremistrent.

Quant bien e bel armé se furent,

16244 Lors atornerent comme il durent

Lor batailles e conreerent

E lor escheles ordinerent.

Li cuens de Cestre eissi avant,

16248 Proz chevaliers e bien savant,

E li cuens Mareschal aprés,

Il e si fiz tot pres a pres,

Qui molt erent en grant espeir

16252 D'avancier l'euvre a lor poeir.

Si firent il, bien i parut,

Car lor poer molt i valut;

E li boens cuens de Salesbere,

16256 Lequel Damlnedex e sa mere

Face compaignon de sa glorie,

S'en eissi en la tierce estorie.

Li buens evesque de Vincestre,

16260 Qui d'une part ert de l'ost mestre,

Si conduist la quarte bataille

..............................................

Unques point n'en fu enconbrez.

16264 Quant tot li oz fu ennonbrez,

Ne furent il que quatre cent

E .v. chevalier solement,

Ne d'arbalestiers entreset

16268 Fors sol treis cenz e .xvii.;

Poi furent, mes bel se porterent,

Car buene gent e hardie erent.

E quant issi eissu s'en furent,

16272 Al reingnie, si comme il durent,

Lores parla molt hautement

Li Mareschal a cele gent,

Comme cil qui bien le sout feire,

16276 Car mielz en saveit a chief traire,

Si dist: "Ore escoutez, seignor!

Vez ici hautece e enor,

Vez ici, ce nos est a vis,

16280 La delmorance del païs;

Ci poez conquerre, c'est veirs.

Cil nos terres e nos avers

Sesissent e pernent a force;

16284 Honiz seit qui ci ne s'esforce

De metre i, ui cest jor, chalenge,

E Damlnedex conrei en prenge!

Vez les bel isi suz uim;

16288 Itant vos prenc je bien em main

Il sunt nostre, comment qu'il aut,

Se cuers e herdemenz n'i faut.

E se nos morons ...........................,

16292 Dex, qui ses buens veit e descuevre,

Nos met ui en son paradis;

De ce sui je certeins e fis;

E se nos lé vencons, sanz fable,

16296 Nos avrons enor pardurable

Conquise a trestoz nos eages,

A nos e a toz nos lignages.

Si vos dirrai un autre acontre

16300 Qui trop leidement les encontre,

Que il sunt escomenïé,

D'itant sunt il plus enlïé;

Si vos di que mal chief prendront,

16304 Que que en enfer descendrunt.

Vez ci cels qui gerre ont enprise

Contre Dieu e vers seinte Glise;

Itant vos prenc je bien en main,

16308 Dex lé nos a mis en la main.

Haston nos, si lor coron sore,

Car bien est e tens e ore!"

Quant parlé out li Mareschals

16312 Comme proz e comme leials

E come sages chevaliers,

Lors bailla les arbalestiers

Al buen evesque de Wincestre,

16316 Qui de bien mener ses fu mestre,

Pieres, qui molt sout de l'afere

E mult se pena de bien faire.

Aprés lui dist que demaneis

16320 Fust a la destre de Franceis;

E si lor dist que tant feïssent

Que estenduement s'entendissent,

Si que quant li Franceis venissent

16324 Que lor chevals lor occeïssent.

E li Mareschal demanda

Deus cenz serjanz e quemanda

Qu'en ocire meïssent peine

16328 Des couverez lor chevals demeine,

Si qu'en lieu de lices lor fussent

Al besoingn se mestier eüssent.

Tuit cil qui le conte escouterent

16332 Joiosement se demenerent,

E aussins envoisiement

Com se ço fust torneiement.

Laïnz furent Franceis par nombre,

16336 Qui li nonbre ne m'en encombre,

Sis cenz e unze chevaliers;

S'i furent bien mil peoniers,

Estre Engleis qui o els esteient,

16340 Qui encore a els se teneient.

De la vile eissirent eissi

Missires Simons de Peissi

E le conte del Perche o lui

16344 E cil de Vincestre autresi,

Que l'ost des reals sorveïssent

E verité lor en deïssent.

Cil alerent e tost revindrent;

16348 Lor sorveüe a itant tindrent

Que bele gent i ont esmee:

Unques nule mielz acesmee

Ne melz enpernante de guerre

16352 Ne vit mes uns en nule terre.

As noveles que cil lor distrent

Franceis dedenz lor murs se mistrent,

E si distrent que bien saveient

16356 Que li real poër n'aveient

Qu'en la vile les assaillissent,

Quel semblant que il en feïssent,

E distrent qu'il s'en partireient;

16360 Mes ja issi ne s'en ireient

Li real o correies ointes,

Qu'il n'eüssent autres acointes

Al departir, ce s'afichoent,

16364 E bien disoient e mostroent,

Ce lor ert vis, dreite acheison

Coument e pur quele raison

Il avreient del lor assez,

16368 Car lor chevals erent lassez

Des grant fes e des granz tornees,

De l'arester, des retornees,

Qu'il lor couveneit nuit e jor

16372 Que sor els fussent lor seignor.

Li Franceis d'itant veir se distrent,

Mes totes veies s'entremistrent

Li real d'aler bien e tost

16376 Vers la vile e tote lor ost

Herdïement, ne chaut quis veie.

E li Mareschal tote veie

Les amoneste e lor sermone

16380 E herdement e cuer lor done,

Si lor a dit: "Seignor ami,

Veiz ci cels qui sunt arrami

De venir vers vos a bataille

16384 Ont ja depeciee lor caille

E dedenz lor murs se sunt mis;

C'est ce que Dex nos a pramis.

Dex nos done grant glorie;

16388 C'est ci la premiere victorie

Que por nos se muchent Franceis,

Cil qui soleient estre anceis

Li premier al tornïement;

16392 Dex nos feit bel aveiement.

Mult nos haucent e mult s'abessent

Cill qui les chans defors nos lessent.

Nos seron entor la cité,

16396 Cest vos di je por verité;

Feson le bien, car Dex le volt.

Qui c'onques prodom estre seult

Si le soit ui en bone atente;

16400 Ja por un jor ne se repente."

Seignor, ci me covient plus dire,

Car cil qui me donent matire

Ne s'acordent pas tot a un,

16404 Ne je ne puis pas a chascun

Obeïr, car je mefereie,

Sin perdreie ma dreite veie,

Si en fereie mains a creire,

16408 Car en estorie qui est veire